Ошто аймактык шайлоо комиссиясынын депутаттыкка талапкер аялдар тизмеден жапырт чыгарылган чечимдерди бекиткен курамынын ордуна жаңылар бекитилди. Борбордук шайлоо комиссиясы бул маселени 12-сентябрда карап, жаңы курамды резервде катталгандардын эсебинен түздү.
12 мүчөдөн турган комиссияга «Биримдик элдик Кыргызстан», «Ата-Журт Кыргызстан», «Биздин Кыргызстан», «Тилектештик» саясий партияларынан жана жергиликтүү өз алдынча башкаруу органдарынан өкүлдөр кирди.
Быйыл 11-июлда Бишкек, Ош жана Токмок шаарларында жергиликтүү депутаттардын шайлоосу өткөн.
Ошто «Биздин Кыргызстан» партиясы шаардык кеңешке 38 аял талапкерин, «Ата-Журт Кыргызстан» партиясы 39 талапкерин тизмеден чыгарып жатканы, алардын 31и аял экени 26-августта белгилүү болгон.
Аталган эки партиядан депутат болуп шайланган алты адам мандаттан баш тартканы, алардын бешөө аял экени, баары ордун тизмедеги кийинки талапкерге өткөрүп берип жатканы да маалымдалган.
9-сентябрда Борборбук шайлоо комиссиясы (БШК) Ошто аял депутаттардын тизмеден жапырт чыгышы тууралуу чечимдерди колдогон аймактык шайлоо комиссиясын таркатып, анын аялдар боюнча чечимдерин жокко чыгарган. (RK)
