Президент Жапаровдун эс алуусу коомчулукта талкуу жаратты

Президент Садыр Жапаровдун Ысык-Көлдө эс алуусу аталган облусту сел каптап турган учурга дал келди. Мындан сырткары аз күн мурда Бостериде эс алуу жайлардын биринде бир адамды суу түтүгү соруп кеткен. Президент жана УКМКнын башчысы Камчыбек Ташиевдин мындай кырсыктардан катталып жаткан учурда Ысык-Көлдө эс алып жүргөнүн жарыялоосу коомчулукта талкууга жем таштады. Соцтармактарда айрым колдонуучулар президенттин мындай эс алуусун "орунсуз" деп атады. Ошол эле учурда айрымдар ар бир адамдын эс алууга укугу бар экенин айтып чыгышты.