Бүгүн, 18-июндан тартып Бишкектен Балыкчы шаарына каттаган поезд жүрө баштады. “Кыргыз темир жолу” ишканасынын маалыматына караганда, жол кире мурдагы жылдардан өзгөргөн жок. Чоңдорго билет баасы 69 сом, 5-10 жаштагы балдарга 34 сом.
Жума, ишемби жана жекшемби күндөрү Бишкектен саат таңкы 7де чыккан поезд Балыкчыга түшкө маал, саат 12де жетет, кайра артка кечки саат 17:15те чыгып, Бишкекке саат 22де келет.
Бүгүн алгачкы каттам менен жолго чыккан жүргүнчүлөр поездде каалоочулар үчүн вагондордун биринде ресторан ачылганын, эгер жүргүнчүлөрдөн суроо-талап болсо ал кардарларды тейлөөсүн улантарын жазып, сүрөт жана видеолорду социалдык түйүндөргө жарыялап жатышат.
Жайкысын Ысык-Көл Кыргызстанда туристтер эң көп каттаган аймакка айланат. Былтыр коронавируска байланыштуу туристтик сезон учурунда жолдор жабылып, каттамдар токтогон. (RK)
