Ош шаарында нөшөрлүү жаандан улам таза суу берүү убактылуу токтотулду. Мэриянын басма сөз кызматы тоо тараптагы жылгалардан сел жүргөндүктөн Ак-Буура дарыясы ылайланганын билдирди.
Азырынча шаар тургундарына качан суу берилери белгисиз. Ош суу чарба ишканасы жаралган ыңгайсыздыкты түшүнүү менен кабыл алууну суранды.
Ош шаарында 300 миңден ашуун суу колдонуучу расмий катталган. Калаа тургундарына таза суу Ак-Буура дарыясынан ачык суу сактагыч ыкмасы менен берилет. Катуу жамгыр жааганда дарыя ылайланып, элге суу берүү токтотулат. Кээде 2-3 күн суу жок болот.
Подкаст угуңуз
