Борбордук шайлоо комиссиясы (БШК) 8-мартка карата куттуктоосун жарыялап, аялдар үй-бүлө очогунан тышкары саясатка, социалдык тармакка, айыл-кыштактарды жакшыртууга чоң салым кошуп келе жатканын белгиледи.
Ушундан улам алдыда өтө турган жергиликтүү кеңештерге шайлоодо аялдардын – кыздардын, эже-карындаштардын, апалардын, жубайлардын айылдык, шаардык кеңешке депутат болуу чечимин колдоп, кубаттап, зарылчылык болсо көмөктөшүүгө коомчулукту чакырган.
Куттуктоодо ошондой эле БШК аялдар талапкерлигин көрсөткөн айыл аймагы, жергиликтүү өзүн-өзү башкаруу органдарын аялдарды колдоп, ийгиликке жетишүүсүнө жардамдашууга үндөгөн.
“Ошол эле учурда аялдар, кыздар, өзүңөргө ишенгиле. Өлкөбүздүн жашоосуна активдүү катышкыла. Кыргызстаныбызбы өнүктүрүп, ийгиликтүү кылууга салым кошкула. Сиздер үй-бүлөдө, иште гана эмес, коомдук-саясий турмушта да өзүңүздөрдү көрсөтүңүздөр” деп жазылган куттуктоодо.
“Жергиликтүү кеңештерге шайлоо тууралуу” мыйзамга 2019-жылы өзгөртүү киргизилген. Ага ылайык айылдык, шаардык кеңештердеги депутаттардын 30% аялдардан турууга тийиш.
11-апрелде 448 жергиликтүү кеңешке шайлоо өтөт. Мунун ичинен 28и шаардык, 420сы айылдык кеңештер. Жалпысынан жергиликтүү кеңештерге 8326 депутат шайланат. Алардын ичинен аялдар үчүн 2858 квота берилген.(ZKo)
