Өкмөттүк аппараттын мурдагы жетекчиси Бактыбек Аманбаевдин талапкерлиги Кыргызстандын Америка Кошмо Штаттарындагы элчилик кызматына сунуш кылынып жатат. Бул тууралуу маалыматты 10-февралда “Азаттык” радиосуна Аманбаев өзү тастыктап, президент Садыр Жапаровдун макулдугу бар экенин, эми АКШ тараптан жооп болушу керектигин билдирди:
“Бул жактан АКШнын макулдугун сурайт. Алар менин талапкерлигимди карап, эки-үч ай ичинде уруксатын бериши керек. Эгер берсе, ошондо кетет. Бул маселе Садыр Нуркожоевич менен каралып, макулдугу берилди. Бирок маселе бул жактан чечилбейт, АКШда чечилет”.
Аманбаев 2013-2015-жылдары Кыргызстандын акыйкатчысы болуп иштеген. 2020-жылдагы парламенттик шайлоого «Мекенчил» партиясынан талапкер болгон. Өкмөттүн аппаратын ошол жылдын октябрындагы бийлик алмашуудан кийин быйыл февралга чейин жетектеди.
Азыр Кыргызстандын АКШдагы элчилигин Болот Отунбаев жетектейт. Ал бул кызматка 2019-жылдын январь айында дайындалган. (BTo/RK)
