Кыргызстанда өкмөттүк мекемелерге жана жергиликтүү бийлик органдарына элдин ишеними бир жыл мурункуга салыштырмалуу дээрлик 3% азайды. Бул тууралуу Улуттук статистика комитети 20-январда жарыялаган кыска баяндамада айтылат.
Комитет 2020-жылдын декабрында эл арасында сурамжылоо жүргүзгөн. Ага 18ден 75 жаш курактагы 3600 респондент суралган.
Эң төмөн көрсөткүч Мамлекеттик бажы кызматына таандык. Сурамжылоого катышкандардын 3,6% гана ишеним билдирген.
Жаза аткаруу мамлекеттик кызматына, Мамлекеттик мүлк фондуна, Соттук экспертизага, Экономика министрлигине ишеним арткандар 10дон 15% чейин.
Андан башка мамлекеттик органдарга калктын ишеними 50% жетпейт.
