Террорчул уюм болгон "ал-Кайиданын" жетекчисинин орун басары саналган Абу Мухаммад ал-Масри быйыл жайында Иранда жашырынып жүргөн жеринде өлтүрүлгөн.
Абу Мухаммад ал-Масри аты менен таанылган бул инсандын өз ысымы - Абдулла Ахмед Абдулла. "Масри" шарттуу аты - анын тегинин Египеттен экенин көрсөтөт.
Ал "ал-Кайиданын" азыркы таптагы жетекчиси Айман аз-Завахиринин мураскору болот ко деп жоромолдонуп келген.
"Нью-Йорк таймс" басылмасынын 13-ноябрдагы маалыматына караганда, ал-Масри быйыл 7-августта Тегерандын көчөлөрүнүн биринде мотоциклчен эки израилдик тыңчы тарабынан атып өлтүрүлгөн.
14-ноябрда Ирандын тышкы иштер министри бул кабарды четке какты жана Иран жергесинде террорчу "ал-Кайида" уюмунун эч бир мүчөсү жок деп билдирди.
"Нью-Йорк таймс" басылмасынын маалымдашынча, ал-Масринин жанындагы кызы да өлтүрүлгөн. ал болсо "ал-Кайиданын" мурдагы лидери Осама бен Ладендин уулу Хамзанын жесири болгон.
Шийилер бийликте турган Иран менен суннийлерден чыккан "ал-Кайида" терррочу тобу өз ара душман саналышат. Бирок АКШнын чалгын кызматынын маалыматына караганда, ал-Масри 2003-жылдан тартып Иранда абакта отурган жана 2015-жылдан тартып бул өлкөдө ээн-эркин байырлап келген.
Расмий Тегеран болсо өзүнүн "ал-кайидачыларга" баш паана бергендиги тууралуу ар кандай кабарды жалганга чыгарып келет.
