Депутат Талант Мамытов: - Коомдук, саясий, экономикалык, эпидемиологиялык оор жагдайда “Республика – Ата Журт” фракциясы менин талапкерлигимди сунуштады. Албетте ичимден кыжаалат болуп турам, сүйүнгөн жокмун. Бирөө креслону ойлосо, башкасы үчүн бул кызмат чоң жоопкерчилик. Мен баарынын астында жоопкерчилигимди сезип атам. Бүгүнкү парламент миссиябызды аткарып, эл алдында жүзүбүз жарык иштей беребиз деп ишенем. Легитимдүү бийлик бар, толкундоого карабастан баары укук талаасына кайтып келди. Бүгүнкү парламент өз милдеттерин толук аткарууда.
Депутат Талант Мамытов: - Арабызда тажрыйбалуу депутаттар бар, беш жыл чогуу иштедик. Ушул тажрыйбаны бирге колдонолу. Мага силердин колдооңор керек. Эгерде бүгүн мени шайлап берсеңер, мен баарыңарга калыс карайм деп сөз берем. Башка фракциялардан деле талапкерлер чыкса болмок. Бирок баарыңар мени көрсөттүңөр. Элдин, силердин ишеничиңерди актап берем деп ишенем.
Депутат Өмүрбек Текебаев: - Көпчүлүк бүгүнкү төраганын алмашканын тактикалык кадам катары түшүнүүдө: досу шайлоого кетсе, ошонун ордун кайтарганы коюп атат деп түшүнүп жатат. Бирөөнүн ордун кайтарып эмес, өлкөнүн мыйзам сакчысы болуп келатасыз. Бүгүнкү парламентти жакшы да, жаман да көрүшөт. Бирок биз жалгыз легитимдүү органбыз.