Жогорку Кеңештин депутаттары төрагалыкка көрсөтүлгөн Талант Мамытовдун талапкерлигин колдошту. Талант Мамытов – президенттин милдетин аткарып жаткан премьер-министр Садыр Жапаровдун саясаттагы эң жакын үзөңгүлөштөрүнүн бири. Садыр Жапаров президенттикке талапкер болуп калса, Талант Мамытов анын ордуна президенттин милдетин аткарып калат.
Эртең менен Канатбек Исаев парламенттин төрагасы кызматын тапшырган. Муну саясатчы өзү жетектеген "Кыргызстан" саясий партиясы президенттикке талапкерликке сунуштап жатканы, бул сунушту кабыл алганы менен негиздеди.
Борбордук шайлоо комиссиясынын мүчөлүгүнө Акылбек Сариевдин талапкерлиги көрсөтүлдү. Сариев 2010-2011-жылдары Боршайкомдун төрагасы, 2002-2008-жылдары мүчөсү болгон.
Жогорку Кеңештин депутаттары төраганын кызматына жана БШКнын мүчөлүгүнө көрсөтүлгөн талапкерлерге добуш берүүдө.
