Кыргызстанда соңку бир сутка ичинде COVID-19 илдети дагы 484 кишиден (U07.1 жана U07.2) жаңы аныкталды, илдеттен үч адам каза болду. Бул тууралуу 31-октябрда Коронавируска каршы республикалык ыкчам штаб маалымдады.
Маалыматка караганда, көз жумган бейтаптын үчөө тең Баткен облусунун тургундары.
Жаңы учурлардын көбү Бишкек шаарына (123) жана Жалал-Абад облусуна (110) туура келет. Ош шаарында жана калган облустарда беш-ондон, айрымдарында 50-60тан катталды.
31-октябрга карата соңку бир күндүн ичинде COVID-19 илдетинен сакайып чыккандар, пневмонияны эсепке алганда 461 адамды түздү.
Расмий маалыматка караганда, Кыргызстанда коронавирус пандемиясы башталган март айынан бери илдет 58 878 кишиге жукту. Анын 49 983 айыкканы айтылды.
Вирустан 1 145 адам кайтыш болду.
Учурда 3413 бейтап стационарда, 3767 киши үй шартында дарыланууда. (ErN)
