Улуттук банк 25-сентябрда валюта рыногунда интервенция жасап, 19,6 миллион АКШ долларын сатыкка чыгарды. Бул тууралуу мекеменин сайтында кабарланды.
Башкы каржы көзөмөл мекемеси акыркы жолу 23-сентябрда 11,2 миллион доллар саткан. Бул аракет улуттук валюта – сомду колдоо максатында ишке ашууда.
2020-жылдын башынан бери валюта рыногунда ушуну менен жалпы 12 интервенция жасалып, сатылган доллар 258,2 миллионду түздү.
Акыркы кезде Кыргызстанда доллардын сомго карата курсу жогорулап жатат. 26-сентябрда бир доллардын наркы расмий түрдө 79,49 сомго бааланууда. Талдоочулар соңку эки жумада доллардын курсу 79 сомдон ашып кеткени валюта рыногундагы жеңил дүрбөлөңгө негиз болгонун белгилешти. (ErN)
