«Жалпы иш» коомдук фонду шайлоого карата сурамжылоо жүргүзүп, ага катышкандардын 75% шайлоо күнү добуш бергени бара турганын аныктады. Бул тууралуу фонд 17-сентябрда өткөргөн басма сөз жыйынында жарыялады.
Сурамжылоого катышкандардын 60% коронавирус боюнча эпидемиологиялык абал кандай болсо да баары бир шайлоого барарын билдирген.
Коомдук фонддун 21-августтан 4-сентябрга чейин өткөргөн сурамжылоосуна 18 жаштан улуу курактагы 1202 респондент телефон аркылуу катышты.
Бул иш-чара элдин шайлоого жана ага катышып жаткан саясий партияларга карата ой-пикирин, көйгөйлөрүн билүү максатында уюштурулган.
Суроолорго жооп бергендердин 55% өзүн шайлоочулардын тизмесинен текшерсе болору тууралуу кабары жок экенин айткан. Ал эми 65% добуш сатып алууну эң кооптуу жагдай катары мүнөздөгөн.
16-сентябрга карата Кыргызстанда шайлоочулардын тизмесине үч миллион 429 миң адам кирди. Участкалык шайлоо комиссияларынын саны 2 462. Жетинчи чакырылыштагы Жогорку Кеңешке шайлоо 4-октябрда өтөт. 120 орунга 16 партиядан эки миңдей талапкер ат салышууда. (RK)
