АКШда Флорида жана Техас баштаган бир катар штаттарда коронавирус жугузуп алган жарандардын саны көбөйдү. Алабама, Аляска, Аризона, Арканзас, Калифорния, Түндүк Каролина, Оклахома, Түштүк Каролинада соңку үч-төрт күн катары менен ооруга кабылгандар жапырт көбөйүп, эң жогорку чекке жетти.
Саламаттык сактоо тармагынын өкүлдөрү илдеттин көбөйүп кетишин өткөн айдын аягындагы Эскерүү күнү жапырт белгилениши менен байланыштырып жатышат.
Соңку ишембиде АКШда COVID-19 жугузуп алган 25 миң учур катталды жана бул 2-майдан берки эң чоң көрсөткүч болуп калды. Мындан улам айрым штаттарда ооруканаларда бейтаптар батпай калды.
Нью-Йорктун губернатору Эндрю Куомо жарандар көп-көптөн чогула берсе, анын кесепети оор болорун эскертти. Анын айтымында, аралыкты сактоо өңдүү талаптар сакталбаганына байланыштуу 25 миңден ашык арыз-доомат келип түшкөн.
АКШ коронавируска чалдыккандардын саны боюнча биринчи орунда турат. Бул өлкөдө илдет эки миллиондон ашык жаранга жугуп, оору 117 миңдей кишинин өмүрүн жалмады.
