Кыргызстанда дээрлик токтоп калган кызамык оорусу кайрадан катталып жатат. Саламаттык сактоо министрлиги 27-майда тараткан маалыматка караганда, быйыл жыл башынан бери бул кооптуу жугуштуу илдет менен 717 адам катталды. Алардын көбү Жалал-Абад, Чүй, Ош, Баткен облустарында жана Бишкек, Ош шаарларында жашайт.
Ооруга чалдыккандардын жарымынан көбү - 52% бир жашка чейинки курактагы балдар болгондуктан эмдөө ала элек. 14% ата-энеси эмдетүүдөн баш тартып койгон, 5% ашууну ден соолугуна байланыштуу вакцина албай калган. 2% жакыны эмгек мигранттарынын балдары.
Саламаттык сактоо министрлигинин маалыматына караганда, 2019-жылдын июнь айында бул илдет Кыргызстанда токтогон болчу. Жыл башынан бери 2347 бейтап катталып, июнь айынан тартып бир да учур байкалган эмес. Бирок декабрда ата-энеси Казакстанда эмгек мигранты болуп жүргөн эки баладан оору табылган.
Быйыл коронавирус илдетине байланыштуу карантинден улам эмдөө иштери убактылуу токтоп, 26-майда кайра уланды.
Дарыгерлер кызамык тез жуга турган оор илдет экенин эскертип, ата-энелерди балдарын эмдетүүгө чакырды.
Эмдөө аракеттеринен улам Кыргызстан 1993-жылдан бери полиомиелит оорусу жок өлкө деп аталып келет. Ошондой эле кептөөр, селейме (столбняк), ымыркайлардын кургак учук менингити, В гепатити деген оорулар катталбайт.
Кыргызстандын Эмдөө боюнча улуттук календарына ылайык, кызамыкка каршы вакцина балага бир жана алты жашында сайылганда организминде бул илдетке иммунитет калыптанат. (RK)
