21-майдан тартып Кыргызстанда экономикалык ишмердүүлүктүн айрым түрлөрүнө уруксат бериле баштайт. Бул тууралуу 19-майда биринчи вице-премьер-министр Кубатбек Боронов билдирди.
Анын айтымында, 21-майдан тартып Мамлекеттик каттоо кызматынын, курулуш, тиричилик жана башка тармактардын калкты тейлөө, каттоо борборлору ачылат.
Мындан тышкары:
- Эмерек кураштыруу жана оңдоо ишканалары,
- Соода борборлору (балдар ойноочу аянтчаларын, тез татым жайларын кошпогондо),
- Азык-түлүк эмес товар сатылуучу бардык жайлар,
- Автобазарлар,
- Мал базарлары,
- Жеке репетиторлук кызмат,
- Менчик жана үй-бүлөлүк мончолор (сауналарды жана коомдук мончолорду кошпогондо),
- Мейманканалар (ичиндеги бассейн жана спортзалдар азырынча иштебейт) ачылат.
Ал эми 25-майдан тартып:
- Кийим-кече сатуучу базарлар,
- Тез татым жайларын кошпогондо жайкы кафелер жана ресторандар (50 орундуктан ашык эместери, коноктор арасында 1,5-2 метр аралык так сакталышы зарыл),
- Театр, музей, көргөзмө залдары жана галереялар, китепканалар жана маданий агартуу жайлары;
- Шаар ичинде каттаган автобустар, троллейбустар жана кичи автобустар иштей баштайт.
18-мартта Кыргызстанда коронавирустун алгачкы учурлары катталып, алгач өзгөчө кырдаал, кийин өзгөчө абал режими киргизилгендиктен дээрлик бардык ишкана-мекемелердин ишмердүүлүгү убактылуу токтотулган.
Учурда өлкөнүн көпчүлүк аймактарында өзгөчө кырдаал тартиби күчүндө турат.
Жалпысынан 19-майга карата Кыргызстанда коронавирус 1243 адамдан табылды, алардын ичинен 14 бейтап кайтыш болду, 898 бейтап айыгып кетти. (RK)
