Бишкекте коронавирус дагы эки жаңы конуштун тургундарынан табылды. Бул тууралуу 4-майда онлайн брифингде вице-мэр Татьяна Кузнецова билдирди.
Анын атымында, баш калаада илдет жуккан 231 адамдын 69у шаар четиндеги 16 жаңы конушта жашайт.
Буга чейин вирус 14 конушта табылган, эми алардын катарына Красный строитель жана Эне-Сай кошулду.
Эң көбү Арча-Бешикте – 21 адам. Мындан тышкары Ак-Босогодо 13, Көлмөдө 11, Көк-Жарда беш адам. Ак-Өргөдө жана Ынтымакта үчтөн, Керамическая, Ак-Ордо, Учкунда экиден, Кара-Жыгач, Алтын-Ордо, Касым, Мурас-Ордо, Тынчтык, Красный строитель, Эне-Сай конуштарында бирден адам катталды.
30-апрелде Бишкек мэри Азиз Суракматов баш калаанын тегерегиндеги жаңы конуштарда коронавирус боюнча абал кооптуу экенин айткан.
Бүгүнкү күндө борбордо илдет жуккандар боюнча Ленин району алдыда – 82 адам. Октябрь районунда 45, Биринчи май районунда 41 жана Свердлов районунда 21 адам.
Бишкектин тегерегинде жалпысынан 47 конуш бар. (RK)
