Беларустун Коргоо министрлиги өлкөдөгү эпидемиологиялык кырдаал Улуу Ата Мекендик согуштун 75 жылдыгына арналган парадды 9-майда өткөрүүгө жол берет деп эсептейт.
Бул өлкө жарандарынын коронавируска байланыштуу парадды өткөрбөө тууралуу чакырыктарга, кайрылууларга жооп иретинде айтылды.
Коргоо министри Виктор Хренин иш-чараны аскердик даярдыктын бир бөлүгү деп баалап, «вирус инфекциясына каршы күрөштө өлкөнүн потенциалын өстүрүүгө жардам берет» деп белгиледи.
Ага чейин бийлик 9-майдагы парадды өткөрбөө же жылдыруу маселеси «жада калса караштырылбай» турганын да билдирген эле.
Беларус - карантин чаралары киргизилбеген, коомдук иш-чараларды, анын ичинде улуттук футбол чемпионатын өткөрүүгө чек коюлбаган бирин-экин Европа өлкөлөрүнүн бири.
20-апрелге карата бул өлкөдө COVID-19 инфекциясынан жабыркагандар 6264кө жеткени расмий кабарланды. Алардын ичинен 51 киши көз жумду.
