26-мартта Орусияга караштуу Ингушетия республикасынын борбору Магастагы акцияга миңдеген киши чыкканын уюштуруучулар билдиришти.
Митинг Чеченстан менен Ингушетиянын чек арасы боюнча талаш-тартыш чыккандан кийин уюштурулду.
Шаарда полиция кызматкерлери көбөйтүлүп, митинг өтүп жаткан жерде темир тосмолор орнотулганы кабарланды.
Катышуучулар республика президенти Юнус-Бек Евкуровго ишеним көрсөтпөй турганын айтып, анын кызматтан кетишин талап кылышты.
20-мартта президент республиканын чек арасын, аталышын референдумсуз эле өзгөртүүгө жол берген мыйзам долбоорун Элдик жыйындан чакыртып алган. Бир күн мурда документ парламентте биринчи окуудан өткөн.
Депутаттар аны 28-мартта экинчи окууда талкуулаганы жаткан.
