Илим Карыпбеков Коомдук телерадио корпорациясынын башкы директорлугуна кайрадан ат салышат. Буга аны кызматында калтыруу боюнча КТРКнын жамаатынын Байкоочулар кеңешине, Жогорку Кеңешке жана президентке кайрылуу жибергени негиз болгон.
Бул тууралуу ал "Фейсбуктагы" баракчасына жазды. Карыпбеков өзүн түрдүү амалдар менен кызматка кайра келтирбөө аракеттери жүрүп жатканын белгилеп, шайлоого катыштырбоого кызыккан тараптар бар деген пикирин билдирген. Өзү жетектеген эмгек жамаатынын колдоосун аягына чыгарыш үчүн Илим Карыпбеков кийинки ачык шайлоого катышмакчы.
Илим Карыпбеков 2015-жылы КТРКнын башкы директору болуп шайланган. Кийинчерээк ал Коомдук телеканалдын жетекчилигин шайлоого кайра катышпасын жарыялаган.
Активисттер Илим Карыпбеков жетектеген коомдук телеканал салык төлөөчүлөрдүн эсебинен каржыланарын белгилеп, бирок өз макамына жараша иш алып барбай, бир жактуу, бийликтин камчысын чапкан саясат жүргүзөт деп сындап келишет. Карыпбеков өзү мындай пикирлер менен макул эмес. (ZKo)
