Ырчы Самара Каримова Ош шаарындагы Ниязаалы атындагы музыкалык орто окуу жайдын директорлук кызматын сурап, Маданият, маалымат жана туризм министрлигине өзү арыз менен кайрылган.
Бул тууралуу "Азаттыкка" маданият, маалымат жана туризм министри Азамат Жаманкулов билдирди. Ал мекеменин статс-катчысы Каримованы директорлук кызматка мыйзам бузуу менен дайындаганын, андыктан ал чечим жокко чыгарылганын айтты. Ошондой эле статс-катчынынын чечимине Каримованын арызы негиз болгонун кошумчалады:
- Самара Каримова өзү арыз менен кайрылган экен. "Менин каалоом бар, ушул орунга коюп берүүңүздү өтүнөм" деген арыз жазыптыр. Орун басарым ошол арызды канааттандырган.
Жаманкуловдун айтымында, Каримованы кызматка дайындоо тууралуу буйрукка министрликтин статс-катчысы өзү ишке киришкенге чейин эле кол коюп, документтер даяр болуп калган. Мындан тышкары, териштирүүдө Каримованын кызматы тууралуу буйрукка статс-катчы Өзбекстанга кетип баратып кол койгону, анын башка күнү каттоого алынганы ачыкка чыккан.
Азамат Жаманкулов министр болуп быйыл 25-октябрдан тартып иштей баштаган.
Ал эми Самара Каримова Оштогу музыкалык орто окуу жайдын директору болуп дайындалганын министрлик 30-октябрда кабарлаган. Мекеменин маалыматында министр Азамат Жаманкулов алты айлык сыноо мөөнөтү менен ырчыны музыкалык мектепке жетекчи кылып дайындоо тууралуу чечим кабыл алганы айтылган.
1-ноябрда министрлик "кызматка дайындоодо мыйзам бузулган" деген жүйө менен Азамат Жаманкулов Каримованы иштен бошотконун жарыялады.
Ырчы бул чечимдер тууралуу "Азаттыкка" комментарий бере элек. Интернеттеги социалдык тармактардагы баракчаларына ал кейиштүү абалда турган окуу жайды оңдоо ниети бар экенине карабай, бут тосууга кабылганын жазды.
27 жаштагы Самара Каримова былтыр "Сулайман-Тоо" музей комплексине жетекчи болуп дайындалып, коомчулуктун катуу сынына кабылган. Ошондон кийин ырчы бул кызматтан баш тартканын жарыялаган.
Оштогу Ниязаалы атындагы орто окуу жайында буга чейин өрт чыккан. Эскирип калган жана өрт чалган имарат оңдоло элек. (NT)
