Казакстанда 23 жыл тамеки талаасында, тоодо мал багып иштеп жүргөн 51 жаштагы кыргызстандык Зуура Боллоева мекенине кайтып, жакындары менен жолукту.
Бир туугандардын жолугушуусу 19-сентябрда Бишкекте эл аралык Кызыл жарым ай коомунун издөө кызматынын 25 жылдыгына арналган жыйында болду.
Зуура Боллоева Оштун Кара-Кулжа районунун тургуну. Аны бир апта мурун аталган уюм Астанадагы кыргыз диаспорасы менен бирге тапкан. Боллоева документи жоктугунан мекенине келе албай, жыйырма жыл бою тамеки талаасында, тоодо мал багып иштеген.
Аны кулчулукта кармагандарга чара көрүү боюнча учурда документтер даярдалып жатканы айтылды.
Расмий кабарга ылайык, Кызыл жарым ай коомунун издөө кызматы Кыргызстанда иштей баштагандан бери үч миңдей кайрылуу түшүп, 135 үй-бүлө жакындарын тапкан. Жоголгондорду издөө көбүнчө КМШ өлкөлөрүндө жүргөн. (AiA)
