Израилдин премьер-министри Биньямин Нетаньяху 17-августта өлкөнүн ири телекоммуникациялык компаниясына каршы ачылган кылмыш ишинин алкагында сурак берди.
Полиция өкмөт башчынын резиденциясына жума күнү таңга жуук барды. Ал маалда имараттын жанында демонстранттар топтолуп, колуна “Кылмышкер” деген жазуулары бар кагаздарды көтөрүп турушкан.
Полициянын версиясына ылайык, Нетаньяху Bezeq Telecom Israel компаниясына нормативдик жеңилдиктери мыйзамсыз ыйгарган. Муну менен өкмөт башчы компанияга караштуу жаңылыктар агенттиги аялынын ишмердүүлүгүн байма-бай чагылдыруусун көздөгөн деп айтылууда. Нетаньяху мындай дооматтарды четке кагып келет.
68 жаштагы Беньямин Нетаньяху экинчи мөөнөтүн аркалап жатат, жалпысынан 12 жыл өкмөттү жетектеди.
