Кыргызстанда эркектердин жоопкерчиликсиздиги жалпы элдик мүшкүлгө айланды. Жогорку Кеңештин "Ата Мекен" фракциясынын депутаты Айсулуу Мамашова бүгүн ушундай пикирин билдирди.
Парламенттин жалпы жыйынында сүйлөп жатып ал жардам сурап кайрылган кыз милициянын имаратында ажал тапканын кескин айыптап, "эркектер бул маселени парламенттен айтып чыгууну да зарыл көрүшкөн жок" деди.
Ушул аптада Чүй облусунун Жайыл райондук ички иштер бөлүмүндө милиция кызматкерлеринин жанында 20 жаштагы кыздын өмүрү кыйылды.
Аны ала качып баратканда кармалган кылмышка шектүү милиция бөлүмүндө кызды мыкаачылык менен бычактап өлтүрүп, андан кийин өзүнө кол салганы, учурда жандандыруу бөлүмүндө экени кабарланды. (RK)
