Орусиянын Тышкы иштер министрлиги АКШнын президенти Дональд Трамптын Ирандын өзөктүк программасы боюнча макулдашуудан бир тараптуу баш тартканына “терең өкүнүчүн” билдирди. Тышкы иштер мекемесинин сайтына жарыяланган билдирүүдө 2015-жылы жетишилген эл аралык келишим - Улуттар Уюмунун Коопсуздук кеңешинин резолюциясы менен бекитилген “көп тараптуу маанилүү макулдашуу” экени баса белгиленет.
Москванын билдирүүсүндө 8-майда жарыяланган чечим – Вашингтондун “сүйлөшүүгө жөндөмсүз экенинин жаңы далили” деп айтылат.
Ошондой эле Ирандын өзөктүк ишмердиги “толук мыйзамдуу” экени, ал эми америкалыктардын сындаганы “Тегерандан саясий өч алуунун айласы” деп айтылат.
