Орусиянын Ички иштер министрлиги уруксат берилбеген акцияда 263 жаран кармалганын маалымдады. Алар учурда милиция бөлүмдөрүнө жеткирилип, териштирүү иштери жана протоколдор толтурулуп жатат.
Кармалгандардын арасында “Эхо Москвы” радиосунун журналисти Андрей Ежков дагы бар. Бул тууралуу ТАСС басылмасына күч органдарындагы булагы билдирген. Журналист кармалган учурда кабарчы экенин айткан эмес жана аты-жөнүн тактоо үчүн полиция автобусуна алып баратканда күч кызматкерлерине каршылык көрсөткөн.
Буга чейин Москва, Санкт-Петербург, Красноярск шаарларындагы акцияларда 86 адам кармалганы кабарланган.
Оппозиционер Вячеслав Мальцев 2017-жылдын 5-ноябрын “Жаңы тарыхый доордун” башталышы деп атап, өзүнүн "Артподготовка" аттуу YouTube каналы аркылуу тарапташтарын 5-ноябрда Орусиянын шаарларында акцияга чыгууга үндөгөн. Ал ошондой эле элди орус президенти Путин бийликтен кетмейинче тарабай турууга чакырган.
