"Азаттыктын" заманбап телестудиясы ачылды
3-ноябрда “Азаттык” үналгысынын Бишкектеги заманбап телестудия менен жабдылган иш кеңсесинин жана 1916-жылкы Улуттук боштондук күрөшүнө арналган “Үркүн. Кылымдар унуткус кыргын” китебинин бет ачаары болду. Иш-чарага Жогорку Кеңеш депутаттары, өкмөт мүчөлөрү, коомдук-саясий ишмерлер, жарандык коомдун өкүлдөрү жана медиа коомчулук катышты. “Азаттык” үналгысынын жогорку сапаттагы телеберүүлөрдү даярдап, бир эле учурда ар кандай платформаларда түз эфирге чыгууга жана ар кайсы өлкөлөр ортосунда телекөпүрө уюштурууга мүмкүнчүлүк берген акыркы үлгүдөгү шаймандар жана заманбап технологиялар менен жабдылган студиясы быйыл ишке кирди. "Азаттык” үналгысы “Үркүн. Кылымдар унуткус кыргын” китебин Үркүндүн 100 жылдыгына карата басып чыгарды.
