Иранда оппозициячыл диниятчы Мехди Карруби жүрөк оорусуна байланыштуу ооруканага түштү. Анын уулу Мухаммад Тагхи Карруби атасынын саламаттыгынын начарлашына анын үй камагында кармалганы себеп болгонун "Азаттыктын" Иран редакциясына 24-июлда билдирди.
Кезинде парламенттин спикери болгон Карруби жана анын жубайы расмий айып тагылбаса да 2011-жылдан бери үй камагында. Диниятчы март айында да кыска убакытка ооруканага жатып чыккан. Бийлик Каррубини исламдын жана революциянын принциптерине шек келтирген деп күнөөлөп келет.
Карруби 2009-жылдагы талаштуу президенттик шайлоо жана өлкөдөгү адам укуктарынын абалы боюнча бийлик өкүлдөрүн кескин сындап келген. Эл аралык укук коргоо уюмдары бир нече жолу оппозициячыл саясатчыны бошотууга чакырышкан.
