"Бир дүйнө-Кыргызстан” укук коргоо кыймылы адам укугуна арналган тасмалардын кезектеги фестивалына фильмдерди кабыл алуунун мөөнөтүн 30-июнга чейин узартты. Бул тууралуу “Азаттык” радиосуна аталган кыймылдын жетекчиси Төлөкан Исмаилова кабарлады. Анын айтымында, фестивалга катышуу үчүн 40тан ашуун тасма келип түштү:
- Бул ирет Казакстан менен Өзбекстан кызыкдарлыгын билдирип, Борбор Азия чөлкөмүнө убакытты узартууну суранышкан. Эл аралык фильмдердин баарын тандашты. Анын ичинде 21 тасма бар. Ал эми Борбор Азия үчүн мөөнөт 30-июнда бүтмөй болду.
Мыкты даректүү тасмалар 15 кишиден турган атайын топ карап чыккандан кийин иргелип алынат. Фестиваль быйыл "Адам укугу жана эркиндиги туруктуу өнүгүү кызыкчылыгында" деген ураан менен 16-20-октбярь күндөрү Бишкекте өтөт.
"Бир дүйнө - Кыргызстан" фестивалы он биринчи ирет өтүүдө. Жыл сайын дүйнөнүн ондон ашуун мамлекетинен тасмалар сунушталып, жеңүүчүлөр Бишкекте сыйланат. "Азаттык" радиосунун журналисттери даярдаган бир нече фильм бул фестивалга катышып, байге алган. (КE)
