Базар-Коргон районунун Акман айылында Ош-Бишкек каттамын тосууну көздөп чыккан "Ата Мекен" фракциясынын лидери, депутат Өмүрбек Текебаевдин тарапкерлеринин ичинен бир аял эсин жоготту.
"Азаттык" радиосунун кабарчысы билдиргендей, азыркы тапта "Тез жардам" келе элек. Эсин жоготкон аялды ал жерде тургандар милициянын машинесине салуудан баш тартышкан.
Чогулган жүзгө чукул адам күч кызматкерлери менен тирешип турушат. Нааразы тараптын каттамды тосуу жана машинелерди өткөрбөө аракетине милиция кызматкерлери жол бербей, аларды четке алып чыгууда.
Базар-Коргондо Текебаевдин бошотулушун талап кылган митинг эки күндөн бери өтүүдө. Бүгүн райондук акимчиликтин алдына боз үйлөр да тигилген. Ал жерде 300дөй адам Текебаевдин камалышын мыйзамсыз деп атап, аны чыгарууну талап кылууда. (RsK/NT)
