Калың кардан жабыркаган Чаткал районунун тургундарына Өзгөчө кырдаалдар министрлиги жөнөткөн гуманитардык жардам бүгүн, 21-февралда тургундарга берилет.
Аталган министрликтен кабарлашкандай, 17-февралда жөнөтүлгөн курулуш материалдары жана азык-түлүк катаал аба ырайынан улам дарегине жеткен эмес. Чапчыма ашуусундагы бороондон улам жүк машинелери артка кайтып, Таш-Көмүрдө жана Терек-Сайда калганга мажбур болушкан. Бүгүн Жалал-Абад облустук өзгөчө кырдаалдар башкармалыгынын жетекчиси Абдишарип Бекилов башында турган топ гумжардамды дарегине жеткирери кабарланды.
Өткөн жумада Чаткал жана Каныш-Кыя айылдарында кардын калыңдыгы эки метрге жеткен. Мындан улам аймакта чукул кырдаал жарыяланып, 17-февралда кайра алынган. Жергиликтүү тургундар азык-түлүк түгөнүп баратканын айтып, өкмөттөн жардам сурашкан. Кар басып калган бир үйдүн, алтын казган ишкананын ашканасынын чатыры кулаган.
20-февралда районду башка аймактар менен байланыштырган жол кардан тазаланган. (SE)
