Бүгүн Бишкек шаарынын мэри кызматына талапкерлерди көрсөтүү мөөнөтү аяктайт. БШК шаардык кеңештеги партияларга талапкер сунуштоо боюнча 4-январга чейин убакыт берген.
Буга чейин Социал-демократтар, “Республика - Ата Журт” жана “Кыргызстан” фракцияларынан түзүлгөн көпчүлүк коалиция азыркы мэр Албек Ибраимовдун талапкерлигин кайра көрсөткөн. Ал эми оппозициядагы “Өнүгүү-Прогресс” фракциясы Нурдин Абдылдаевди көрсөтүүдө. Бишкек шаардык мэрин шайлоо 11-январга белгиленген.
11-декабрда өткөн жергиликтүү кеңештерге шайлоонун жыйынтыгында Бишкек шаардык кеңеши КСДП, “Республика-Ата Журт”, “Кыргызстан”, “Өнүгүү-Прогресс” жана “Мекеним Кыргызстан” фракцияларынан куралган. Оппозицияда “Өнүгүү-Прогресс” жана “Мекеним Кыргызстан” фракциялары калган. (NT)
