Жогорку Кеңештеги КСДП фракциясы “Ата Мекен” жана “Өнүгүү-Прогресс” фракциялары менен пикир келишпөөчүлүктөн улам көпчүлүк коалициядан чыкты. Бул тууралуу социал-демократтардын лидери Иса Өмүркулов билдирди. Анын айтуусунда, былтыр коалиция түзүлгөн кездеги ой-максаттар ишке ашпай калгандыктан, ушундай чечим кабыл алынган:
-Кийинки кездеги окуялардан, карама-каршылыктардан улам көпчүлүк коалициядагы фракциялар оппозиция жана позицияга бөлүнүп калды. Андай коалициянын өмүрү кыска болот. Ошондуктан, биз чыгып жатабыз.
Конституцияга киргизилип жаткан өзгөртүүлөрдөн улам КСДП менен “Ата Мекен” жана “Өнүгүү-Прогресс” фракцияларынын ортосунда пикир келишпөөчүлүк жаралган. Мындан улам Иса Өмүркулов “атамекенчилерге” коалициядан чыгууну сунуштаган, бирок ал ишке ашкан эмес.
“Ата Мекендин” лидери Өмүрбек Текебаев КСДП өкмөттүн жана премьер-министрдин ишине баа бербей туруп коалициядан чыгып кетиши туура эместигин билдирди. (SE)
