Кытай жарандарына жана Түркиянын аэропортунда 3-июлда кармалган Кыргызстандын жасалма паспортторунда мамлекеттик каттоо кызматынын тиешеси жок.
Бул тууралуу Мамлекеттик каттоо кызматынын башчысы Тайырбек Сарпашев “Азаттыкка” билдирди. Анын айтуусунда, бул жасалма паспорттор Кыргызстандан тышкары аймакта жасалган болушу мүмкүн.
- Жеке эле бизде эмес, жалпы дүйнө жүзүндө жасалма паспорт көйгөйү бар. Ошондуктан, биз жарандарыбыздын биометрикалык маалыматтарын да камтыган жаңы паспорт киргизели деп атабыз. Андай паспорт киргизилсе, жасалма паспорт маселеси чечилет, - дейт Тайырбек Сарпашев.
3-июлда Стамбулдагы Ата-Түрк аэропортунда Украинадан учуп келген эки жарандын жанынан Кыргызстандын паспорттору табылган. Биринин жанынан Кыргызстандын үч ID карты жана туулгандыгы тууралуу беш күбөлүк табылган.
17-майда болсо Стамбулдагы Ататүрк аэропортунан Жиддага учуп жаткан маалда кыргызстандык паспорт менен 98 кытайлык уйгур кармалган болчу.(BkA;ZKo)
