“Ислам мамлекети” экстремисттик топтун туткунундагы 13 дарыгер бошотулганын Украинанын тышкы иштер министри Павел Климкин билдирди. Анын айтуусунда, дарыгерлер Ливиянын Бен Жавад шаарына жеткирилген.
Былтыр расмий Киев Ливиянын Сирт шаарында филиппиндик медиктер менен биргеликте согушкерлер барымтага алган он беш украин дарыгери куткарылганын маалымдаган. Анын алдында Ливияда медицина тармагында иштеген жубайлар да туткунга алынып, кийин бошотулган. Украиналык дарыгерлердин көпчүлүгү Ливияга Муаммар Каддафинин тушунда иштегени барышкан. Алардын айрымдары өлкөдө баш аламандык болуп, бийлик алмашкандан кийин калып калышкан.
