Парламенттеги көпчүлүк коалицияга кирген төрт фракция премьер-министрликке көрсөтүлгөн Сооронбай Жээнбековдун талапкерлигин колдоду.
Акыркылардан болуп “Өнүгүү-Прогресс” жана “Ата Мекендин” депутаттары фракциянын отурумунда анын талапкерлигине макул болушту.
Сооронбай Жээнбеков депутаттардын суроолоруна жооп берип жатып, өзү премьер-министрге талапкер катары көрсөтүлөрүн буга чейин ойлобогонун, анын талапкерлиги партиянын чечими менен сунушталганын билдирди.
Сооронбай Жээнбеков учурдагы парламенттин спикери Асылбек Жээнбековдун бир тууган агасы болгондугуна байланыштуу “төраганын орду кандай болот” - деп суроо салган депутаттар дагы болду. Мындай суроого “Өнүгүү-Прогресс” фракциясынын лидери Бакыт Төрөбаев:
- Бул маселе чечилген. Сооронбай Жээнбеков премьер-министр болуп шайланса, спикер Жээнбеков өз ыктыяры менен арызын жазып ордун тапшырарын билдирди. Бул тууралуу бизге Асылбек Шарипович өзү айтты, - деп жооп берди.
2010-жылдагы бийлик алмашуудан кийин дээрлик 5 жыл өкмөттүн Ош облусундагы ыйгарым укуктуу өкүлү болуп иштеген Жээнбеков өткөн жылдын акырында Кадр кызматынын жетекчиси болуп дайындалган. Ал эми ушул жылдын 23-мартында президенттик аппараттын жетекчисинин биринчи орун басары кызматына бекиген. (SDz)
