20-23-сентябрда Тараз шаарында өткөн жармаңкеде кыргызстандык дыйкандар 200 тоннадан ашуун айыл чарба азыктарын сата алышты. Бул тууралуу Айыл, суу чарба министрлигинин басма сөз кызматы маалымдады.
Ага ылайык, Кыргызстанда өндүрүлгөн азык-түлүккө суроо-талап көп болуп, биринчи эле күнү 200 тонна жашылча-жемиш сатылды. Чүй, Ысык-Көл, Талас, Ош облусунан дыйкандар алма, картошка, капуста, калемпир жана башка жашылча-жемиштерди алып барышкан. Мындан ары Казакстанда кыргызстандык дыйкан-багбандар өстүргөн жашылча-жемиштердин жармаңкеси ар эки жума сайын өткөрүлүп турат. Министрлик “Атакент-Тараз” соода борбору менен Кыргызстанда өкүлчүлүктөрүн ачуу боюнча меморандум түзгөн. Бул Кыргызстанда өстүрүлгөн жашылча-жемиштердин коңшу мамлекетке тоскоолдуксуз өтүшүнө шарт түзөт деп маалымдайт басма сөз кызматы.
Кийинки жармаңке 8-9-октябрда болот. Бул күндөрү Тараз шаарында Казак хандыгынын 550 жылдыгына арналган майрам болору күтүлүүдө. Жармаңкеге Кыргызстандан жашылча-жемиштерди казактар өздөрүнүн транспорту менен 5-октябрдан тарта ташый башташат. Басма сөз кызматынын тастыктаганы боюнча транспорт, жармаңкедеги соода орундары жана кыргызстандык дыйкандар үчүн турак жай акысыз болот. Ошондой эле Казакстан Кыргызстандан картошка сатып алууну сунуштоодо. (ZKo)
