“Мистраль” эки аскер кемеси боюнча аткарылбаган келишим үчүн Франция Орусияга 950 миллион евро кенемте төлөдү. Мындай маалымат Франциянын Улуттук жыйналышынын расмий сайтында бейшембиде жарыяланды.
Макулдашууга 5-августта Москвада Орусиянын вице-премьер-министри Дмитрий Рогозин жана Франциянын атайын өкүлү Луи Готье кол койгон.
Документте Москва бардык каражатты алмайынча, Париж кемелерди үчүнчү тарапка берүүгө укугу жок экени жазылган.
2011-жылы түзүлгөн келишимге ылайык Франция Орусияга баасы 1 миллиард 300 миллион долларды түзгөн эки аскер кеме бермек. Өткөн жылы Орусия Крымды басып алгандыгына байланыштуу Евробиримдик Москвага каршы кабыл алган санкциялардан улам Париж бул келишим жокко чыгарыларын билдирген.
