Малайзия былтыр Чыгыш Украинанын үстүндө кыйраган учагы боюнча ишти Улуттар Уюмунун эл аралык кылмыш трибуналы териштирүүсүнө жетишүүгө аракет кылат. Орусиячыл жикчилдер көзөмөлдөгөн аймактын үстүндө атып түшүрүлгөн деп шектелген учакта бардыгы 298 адам болгон. Малайзиянын БУУдагы элчиси Рамлан бин Ибрагимдин 2-июнда айтышынча, берегидей сунушту кырсыкты иликтеген беш өлкөнүн адистери даярдаган. Анын долбоору эмки аптада БУУнун Коопсуздук Кеңешинин 15 мүчөсүнө берилип, келерки айда добуш берүүгө коюлушу мүмкүн.
Малайзиянын MH17 учагынын кыйроосуна жооптуулар боюнча Орусия жана Батыш өз ара келише албай, катуу араздашууда.
