4-майда Оштогу Токтогул сейил багында калаа окуучулары арасында согуш ырларын аткаруу боюнча сынактын алгачкы айлампасы болду. “Азаттыкка” Ош шаардык жаштар комитетинен кабарлашкандай, шаардагы ыр-күүгө шыктуу окуучулар арасында “Согуш жылдарындагы ырлар” аттуу сынактын биринчи кароо айлампасына 23 окуучу катышты. Алардын он бири финалдык турга тандалып алынды. Алар 9-май күнү “Согуш жылдарындагы ырлар” фестивалында финалдык турда жарышат. Жеңүүчүлөргө шыктандыруу үчүн гитара, комуз сыяктуу музыкалык аспаптар белекке берилет.
Иш-чара согуштун 70 жылдыгына карата Ош шаардык маданият, билим берүү башкармалыктары жана шаардык жаштар комитети тарабынан уюштурулууда.(YI)
