ЦРУнун башчысы Жон Брэннан эгер Иран өзөктүк курал даярдай турган болсо, аны кандай жоготуулар жана кесепеттер күтүп турганын Ирандын аткаминерлери жакшы билишет деп айтты Fox News телеканалына курган маегинде. Ал 22-мартта аталган телеканалда сүйлөп жатып, Ирандын өзөктүк курал жасоосуна жол бербөөгө АКШда мүмкүнчүлүк көп деп бекемдеди.
АКШ баштаган батыш өлкөлөрү Иранды өзөктүк программасы үчүн айыптап келет. Ал эми Иран программа тынчтык максатты гана көздөөрүн билдирүүдө. Ирандын өзөктүк программасы тууралуу эки тараптын сүйлөшүүлөрү 31-мартта тынчтыктын пайдасына чечилүүгө тийиштиги айтылган.
