9-августта кыргыз-тажик чек арасында атышуу болуп бир кыргызстандык жаран каза таап дагы экөө жараат алды. Бул тууралуу Мамлекеттик чек ара кызматынан билдиришти.
Маалыматка ылайык 9-август күнү саат 17:30 чамасында Тажикстандын Тупакүл аймагында тажик чек арачылары менен кыргызстандык 3 мергенчинин ортосунда атышуу болгон.
Тажикстандын чек ара кызматынын маалыматында, эки жаран окуя болгон жерде кармалган. Алардын жанынан 8 огу менен мергенчи мылтыгы табылган. Кыргызстандык эки жаран учурда Тажикстандын атайын кызматынын Жерге-Тал районундагы убактылуу кармоочу жайында кармалып турат.
Эки тараптын алдын ала иликтөөлөрүнө ылайык, кыргызстандык үч аңчы тажик тарапка мыйзамсыз өтүп кеткенин Чек кызматынан билдиришти.
3 жаран тең Оштун Чоң-Алай районунун тургундары экени тастыкталды. Окко учкан жарандын сөөгү кыргыз тарапка өткөрүлүп берилди.
Бүгүн болуп өткөн окуяны териштирүү үчүн эки өлкөнүн чек ара кызматынын өкүлдөрү жолугушат. (UEz)
