АКШ президенти Вашингтондон Жакынкы Чыгышка бүгүн жол тартат. Барак Обама адегенде эле Сауд Аравияга келип, падыша Абдалла менен сүйлөшүүлөрдү өткөрөт. Сауд падышасы учурда Израиль менен тынчтыкка жетишүү үчүн араб дүйнөсү колдогон, 2002-жылкы тынчтык демилгесин кайра баштоого аракеттенүүдө. Сауд Аравиядан соң Барак Обама бейшембиде Египетке келип, президент Хосни Мубарак менен жолугат. АКШ президенти Каирден мусулман дүйнөсүнө багытталган жана узактан бери күтүлгөн кайрылуусун жасаары күтүлүүдө.
