Бүгүн АКШнын жаңы шайланган президенти Барак Обама өз администрациясынын экономика боюнча курамын жарыялары күтүлүүдө. Обаманын жардамчысы Дэвид Акселрод “Фокс” сыналгысына берген маегинде, АКШнын жаңы каржы министри учурда Улуттук банктын Нью-Йорк бөлүмүнүн жетекчиси, 47 жаштагы Тимоти Гайтнер болорун тастыктады. Президент Билл Клинтон учурунда Каржы министри болгон Лоуренс Саммерс Ак үйдүн Улуттук экономикалык кеңешин жетектээри буга чейин кабарланган. 22-ноябрда Барак Обама Демократиялык партиянын атынан калкка кайрылуу жасап, 2 жарым миллион жумуш ордун түзүүчү план иштеп чыгууга өзүнүн кеңешчилерине көрсөтмө бергендигин билдирген.
