Катарда Батыш жана мусулман дүйнөсүнүн өз ара түшүнүүсүнө арналган конференция ачылды

Конференцияда ириде Мухаммед пайгамбарга тартылган карикатураларга байланыштуу чыккан жаңжаал талкууланмакчы. Карикатуралар эң алгач былтыр сентябрда Даниялык гезитте жарыяланган. Андан бери ал башка өлкөлөрдө, көбүнесе Европа мамлекеттеринде кайра басылды. Буга байланыштуу мусулман өлкөлөрүндө тополоң менен коштолгон нааразылык акциялары чыккан эле. Демонстрациялар азыркыга чейин токтой элек.
Жекшембиде Пакистандын Лахор шаарында полиция исламчыл жаштардын жүрүшүн таратуу үчүн көздөн жаш агызуучу газ колдонду. Карикатурага байланышкан нааразылык жыйындары Гонконгдо, Тегеран шаарында да өттү.