Бирок бул шарттуу жарашуу болмокчу. Бул чечимди Израилдин премьери Ариэл Шарон кубаттап, позитивдүү алгачкы кадам деп атады. Ошол эле учурда ал тынчтык процессин алга жылдыруу үчүн түпкүлүгүндө экстремисттердин баарын куралсыздандыруу зарыл экенин белгиледи. Египеттин борбору Каирге чогулуп, кеңешме өткөрүшкөн он үч топтун, анын ичинде “Хамас” уюмунун жетекчилери шарт катары Израилдин палестин аймактарындагы операцияларын токтотушун жана жөөт түрмөлөрүндө жаткан палестиналыктарга боштондук берилишин талап кылышты.
