Орусиянын Антимонополиялык комитети бүгүн "Байкалфинансгруп" деген ишкананы мамлекеттик "Роснефть" компаниясы сатып алганы тууралуу чечимди бекитти. ЮКОС компаниясынын негизги ишканасы "Юганскнефтегазды" сатуу боюнча аукционго 19-декабрда эки гана компания катышкан жана аны эч кимге белгисиз "Байкалфинансгруп" сатып алган, андан эки күн өткөндөн кийин "Байкалфинансгруптун" өзүн толугу менен "Роснефть" сатып алганы тууралуу жарыяланган. ЮКОСтун башчысы Михаил Ходорковский бир жылдан бери камакта.
