БИШКЕК. Кыргызстандагы жер жана кыймылсыз мүлк рыногу боюнча маселелерди жөнгө салуу үчүн атайын жумушчу комиссия түзүлдү. Ага негиз берген буйрукка президент кол койгондугун чет элдик инвестицияны тартуу боюнча консультативдик кеңештин катчылыгынан кабарлашты. Тутуму 20 адамдан турган жумушчу комиссияга вице-премьер министр Жоомарт Оторбаев төрагалык кылып, жер рыногун жөнгө салуу боюнча сунуштарды президентке, өкмөткө берет. Комиссия жер жана кыймылсыз мүлк рыногунун абалын иликтөө үчүн чет элдик эксперттерди чакырууга жана эксперттик убактылуу топторду түзүүгө укуктуу.
