Кабулда Ооганстандын түздөн-түз коңшулары болгон алты өлкө анын ички иштерине кийлигишпөөнү кепилдеген документке кол койду. БУУнун Ооганстандагы өкүлү Лахдар Брахими бүгүнкү жыйындан соң билдиргендей, ал Ооганстандан сырткаары Кытайдын, Ирандын, Пакистандын, Өзбекстандын, Тажикстандын жана Түркмөнстандын тышкы иштер министрлери же элчилери тарабынан кол коюлган Кабул Декларациясы чөлкөмдүн мамилесинде жаңы доордун башталышын шарттайт, деп үмүттөнөт. Брахиминин айтымында, келишим Ооганстанга тынчтык орнотууда жана согуштан кийинки калыбына келтирүү иштеринде жардам берет. БУУнун баш катчысы Кофи Аннан өз билдирүүсүндө, документти "тарыхый келишим" деп баалаган.
