Суу тоскондор бийликтен чек арадагы талаш жердин тагдырын чечип берүүнү талап кылышууда.
Таластын Көк-Сай айылында 7-июлдан бери Казакстанга кеткен суу буулуп турат. Бүгүн суу тосулган жерге вице-премьер-министр Токон Мамытов жана чек ара адистери барып, нааразы болгон эл менен жолукту.
Вице-премьер Токон Мамытов барганда нааразы болгондор негизги үч талапты коюшту. Алар: кыргыз-казак чек арасындагы кыргыз тарапты көздөй шынаа болуп кирип турган 13 киллометр узундуктагы 4,5 миң гектар жерди кайтарып алуу, өткөн жылы алмашууга макулдашылган 2,6 гектар жердеги орнотулган мамыларды алып салуу жана кыргыз-казак чек арасы өзөн менен бөлүнсүн деген талаптар.
Нааразылыкка чыккандардын бири Нурбай Анарбаев “Азаттыкка” буларды билдирди:
- Каналды жапканыбыздын себеби - чек араны тактап беришсин. Кыргызстан эгемендүүлүк алганы бул аймак тактала элек. 1930-жылкы документтерде чек ара өзөндү бойлоп кетет деп жазылып турат. А булар болсо 4,5 миң гектар жерди шынаа кылып курчап алышкан. Үлүш жерлерге, жайыттарга келиш үчүн биз 20 чакырымдай айланып өтүп жатабыз.
Суу тоскондор
Дагы бир жергиликтүү тургун Айткул Тайлаков талаптары жөнүндө буларга токтолду:
- Биздин талаптар: 2,6 гектар жерибизди кайтарып беришсин жана 2001-2008-жылкы чечимдердин мыйзамдуулук жагы каралсын. Колдон келсе ошондо кеткен жерлерибизди кайтарып алуу. Чек араны тактап жүргөн комиссия башчысы Аламановго учурунда ата-бабаларыбыздын жайыттары, бейиттерибиз кетип жатат деп айтканбыз.
Маселе менен жеринде таанышкан вице-премьер Токон Мамытов эки өлкөнүн парламенттери тааныган келишимдеги жерлер кайтарылбасын, ал эми калган талаштуу жерлерди коңшу тарап менен сүйлөшүү жолу аркылуу чечүү жагы каралаарын айтты:
- 2001-2008-жылдары эки өлкөнүн мыйзамчылары кабыл алган чек ара тилкелерин кайтара албайбыз. Мени тилдесеңер тилдегиле, ачык айтканда ал биздин колдон келбейт. Тиешелүү чечимдер чыккан. Ал эми калган маселелерди жакында коңшу өлкөнүн өкмөтү менен кезиккенде көтөрөбүз.
Нааразылыкка чыккандар суу башына боз үй тигип, кайтарып отурушат.
Ошондой эле Токон Мамытов суу тоскондордон аны ачууну суранды. Бирок нааразылык билдирип жаткан жергиликтүүлөр тиешелүү чечимдер чыкмайын суу ачылбасын айтышты. Учурда суунун башында боз үй тигилип, жергиликтүү активисттер каналды кайтарып отурушат. Аталган канал аркылуу Казакстандын Жамбул облусунун 4 миң гектар айдоо аянты сугарылат.
